जुन्या काळात किंबहुना आजही उन्हाळ्याची चाहूल लागली कि घराघरात आपल्या आज्या, आई ,मावशी सुरु करतात शेवया तयार करण्याची लगबग! मग ते शेवयाचे ओले गहू दळून आणून त्याचं स्वच्छ पांढरया सपिठाच्या बनवलेल्या पांढरयाशुभ्र शेवया! खरंच या शेवयांची रंगतच काही न्यारी आहे! आणि शेवया हा तर आपला महाराष्ट्राचा, हक्काचा पारंपारिक पदार्थ! चला तर मग बनवूया स्वादिष्ट तिखट शेवया.
पण आजकाल या आधुनिक युगात मुलांना भूक लागली की सर्रास 2 मिनिट इंस्टंट नूडल्स देण्याची जणू प्रथाच पडली आहे. मुलांच्या माता सुद्धा त्यांचा हा हट्ट पुरवतात कारण इंस्टंट नूडल्स फक्त 2 मिनिटांत बनते ना! पण मंडळी खरंच पॅकेज्ड फूड (Packaged food) ही मुलांच्या आरोग्यासाठी चांगली आहे का? तर त्याचे उत्तर आहे नाही. जर तुमची मुले अति प्रमाणात इंस्टंट नूडल्स सारख्या मैद्याच्या पदार्थांचे सेवन करत असतील तर तुम्ही वेळीच त्याला आवर घातला पाहिजे. कारण इंस्टंट नूडल्स मध्ये जरी काही पोषक तत्वे आहेत असे सांगण्यात येत असले तरी ती पोषक तत्वे मुलांच्या आरोग्यासाठी योग्य नाहीत. शिवाय हा एक पाकीटबंद पदार्थ असून असे पदार्थ मुलांनी जास्त प्रमाणात खाणे हानिकारक ठरू शकते.
आता अनेक पालकांना असाही प्रश्न पडतो कि इंस्टंट नूडल्स नाही तर मग दुसरे काय? तर त्याचे उत्तर दडलंय आपल्या आजच्या या पदार्थात ! इंस्टंट नूडल्स ला पर्याय म्हणून झटपट अगदी १० मिनिटात तयार होणार्या आणि पौष्टीक्तेने परिपूर्ण अशा या तिखट शेवया आज आपण बनवूया!
बनविण्यासाठी लागणारे साहित्य- तिखट शेवया
- घरी बनवलेल्या शेवया -१ वाटी
- गाजर (carrot) १/२ बारीक कापलेला
- शिमला मिरची (bell pepper/capsicum) १ बारीक कापलेला
- फुल कोबी (cabbage) कापलेला १/२ वाटी
- कांदा(onion) १ बारीक कापलेला
- टमाटर(tomato) १ बारीक कापलेला
- लसून( garlic) ६ पाकळ्या बारीक कापलेल्या
- कोथिंबीर-१/२ छोटी वाटी
- हिरवी मिरची -२
- कढीपत्ता ५-१० पाने
- १/२ छोटा चमचा जिरे ( cumin seeds)
- १/२ छोटा चमचा मोहरी ( mustard seeds)
- शेंगदाणे -१ चमचा
- लाल तिखट (red chilly powder) -१ चमचा
- मीठ (salt)-चवीप्रमाणे
- तेल (cooking oil) -३ चमचे
बनविण्याची विधी -तिखट शेवया
- सर्वप्रथम कढई थोडेसे तेल घालून शेवया लालसर भाजून घ्याव्या व एका ताटात काढून घ्याव्या
- त्यानंतर कढई मध्ये ३ चमचे तेल गरम करून त्यात जिरे, मोहरी, लसून, कढीपत्ता,शेंगदाणे घालून थोडावेळ फोडणी तडतडू द्यावी. त्यानंतर बारीक कापलेला कांदा ,टमाटर घालून परतून घ्यावा.
- त्यानंतर त्या मिश्रणात हळद ,लालतिखट, व मिठ घालून व्यवस्थितपणे एकत्रित करून घ्यावे.आणि चांगले परतवून घ्यावे.
- कढई तल्या मिश्रणाला तेल सुटू लागले कि त्यात १ ग्लास पाणी ओतावे .
- आता या फोडणी घातलेल्या पाण्याला चांगली उकळी आल्यावर त्यात भाजून घेतलेल्या शेवया टाकाव्या.
- सर्व मिश्रण नीट परतून घ्यावे.
- मंद आचेवर ५ मिनिटे कढई वर झाकून ठेवून शेवया शिजू द्याव्या.
- ५ मिनिटांनी शेगडी बंद करून झाकण बाजूला करावे.
- गरमागरम शेवया वरून कोथिंबीर घालून मुलांना खायला द्याव्या.
या शेवया पौष्टिक, पचायला हलक्या आणि झटपट तयार होणाऱ्या सकाळच्या नाष्ट्याला अगदी उत्तम पर्याय आहे. याशिवाय डब्ब्यात, मधल्या सुट्टीत खायला सुद्धा देता येईल.
या शेवयांमध्ये मोठ्या प्रमाणावर कर्बोदके असतात जी शरीराला उर्जा देण्याचे महत्त्वपूर्ण काम करतात. शेवया बनवताना तुम्ही त्यात विविध प्रकारच्या भाज्या टाकू शकता. यामुळे त्यातील व्हिटॅमिन आणि प्रोटीन वाढते. याचा फायदा मानसिक आणि शारीरिक दोन्ही वाढीसाठी होतो. तुम्ही शेवयात तूप सुद्धा मिसळून मुलाला देऊ शकता. यामुळे त्याच्या विकासासाठी गरजेचे असणारे मेद त्याला त्यातून मिळेल. वर कृतीमध्ये सांगितलेल्या भाज्या शेवयांमध्ये तुम्ही टाकल्या तर त्यातून मुलाच्या त्वचेला फायदा होईल. वरील कृतीमध्ये आम्ही शक्य तितक्या पौष्टिक भाज्यांचा समावेश केला आहे यामुळे मुलाचे वजन वाढण्याचा धोका सुद्धा उद्भवणार नाही.
चला तर मग आजच बनवूया मग आपल्या बच्चेकंपनी साठी तिखट शेवया !
आरोग्य आणि पोषण सूचना: या वेबसाइटवरील आरोग्य आणि पोषण माहिती सामान्य माहिती देण्यासाठी आहे. प्रत्येकाची पोषण गरज वेगवेगळी असू शकते. वैयक्तिक आहार सल्ल्यासाठी आपल्या आरोग्यतज्ञाचा सल्ला घ्या. आम्ही दिलेल्या माहितीची अचूकता सुनिश्चित करण्याचा प्रयत्न करतो, परंतु ही माहिती वैद्यकीय सल्ला नाही.
