गहू हे धन्य आज पृथ्वीवरील अन्नाच्या महत्वाच्या स्त्रोतापैकी एक आहे. गव्हात 75 ते 80% कर्बोदके, 9 ते 18% प्रथिने, फायबर, अनेक जीवनसत्त्वे (विशेषत: ब जीवनसत्त्वे), कॅल्शियम, लोह आणि अनेक मॅक्रो- आणि सूक्ष्म पोषक घटक असतात. गहू हा मधुर, थंड, पचावयास जड, कफकारक, बलकारक, व जुलाबावर गुणकारी आहे. गहू म्हंटल आपल्या डोळ्यासमोर चपाती, पराठा येतो. पण आज आपण गव्हाच्या पिठाचा केक बनवणार आहोत.
गव्हाच्या पिठाचा केक एक गोड पदार्थ आहे जो छोट्या बच्चेकंपनी च्या आवडीचा आहेच पण मोठी मंडळी सुद्धा आवडीने खातील. तीन ते चार दिवस सहज टिकणारा आणि नाश्त्याच्या वेळी खाता येणारा असा केक अवघ्या २० मिनिटांत तयार होईल आणि त्यासाठी खूप कमी घटकांची गरज आहे. चला तर मग आपला केक बनवायला काय काय साहित्य लागणार आहे ते आधी बघुयात!
साहित्य – गव्हाच्या पिठाचा केक
- गव्हाचे चे पीठ – दोन वाट्या
- साखर (बारीक केलेली) -एक मोठी वाटी
- तूप -१ छोटी वाटी
- बेकिंग पावडर -१ छोटा चमचा
- बेकिंग सोडा -१/२ छोटा चमचा
- दुध -१/२ वाटी
- ड्रायफ्रुट्स-आवडीनुसार
बनविण्याची विधी – गव्हाच्या पिठाचा केक
- सर्वप्रथम दोन वाटी कणिक 1 वाटी बारीक केलेली साखर,१ वाटी तूप आणि १/२ वाटी दुध एकत्र करून घ्या.
- सर्व मिश्रण चमच्याने छान फेटून घ्या.
- फेटून घेतलेल्या मिश्रणात १ छोटा चमचा बकिंग पावडर १/२ छोटा चमचा बेकिंग सोडा घाला
- मिश्रण परत एकदा फेटून घ्या
- आवडत असल्यास त्या मिश्रणात थोडे ड्राय फ्रुट्स घालू शकता
- ज्या आकाराच्या भांड्यात केक बनवायचा आहे त्या भांड्याला थोडे तूप लावून त्यात हे मिश्रण व्यवस्थित ओता.
- आता शेगडी वर कुकर ठेवून, कुकरमध्ये खाली पाणी घालून त्यात छोटी जाळी, प्लेट किवा छोटे स्टँड ठेवून आता त्यावर हे मिश्रण ओतलेले भांडे ठेवा.
- कुकरचे झाकण लावून घ्या.
- कुकर च्या झाकणाची शिटी काढून घ्या, आपल्याला विना शिटीनेच केक बेक करायचा आहे.
- १० मिनिटांनी शेगडी बंद करून कुकर थंड होऊ द्या.
- आता झाकण उघडून भांडे बाहेर काढा.
केक तयार आहे भांडे उलटवून केक एखाद्या थाळीत काढता येईल. केक छोट्या – छोट्या तुकड्यामध्ये कापून सर्व करा.
असा हा मैदा, अंडी यांचा वापर न करता अगदी थोड्याशा साहित्यात बनणारा दुध व तुपाचे पौष्टिक गुणांनी युक्त संपूर्ण शाकाहारी केक झटपट तयार होतो आणि चविष्ट असल्याने तितक्याच लवकर संपतोही….
गव्हामध्ये असणारे खनिजे जसे की मॅग्नेशियम आणि सेलेनियम हृदयाच्या आरोग्यासाठी फायदेशीर असतात. गव्हाच्या पिठाचा योग्य प्रमाणात वापर केल्यास, तो संपूर्ण आरोग्यासाठी उपयुक्त ठरतो. म्हणूनच, गव्हाच्या पिठाचा समावेश केल्याने आपल्या आहारात पोषण मूल्य वाढते.
मग करायचा हा केक तयार?
महत्वाची सूचना: गव्हाच्या पिठात ग्लूटेन, हे एक प्रोटीन असते ज्याची काही लोकांना ऍलर्जी असते किंवा ते संवेदनशील असतात. सेलियाक रोग किंवा ग्लूटेन असहिष्णुता असलेल्या व्यक्तींनी गव्हाचे पीठ टाळावे.
आरोग्य आणि पोषण सूचना: या वेबसाइटवरील आरोग्य आणि पोषण माहिती सामान्य माहिती देण्यासाठी आहे. प्रत्येकाची पोषण गरज वेगवेगळी असू शकते. वैयक्तिक आहार सल्ल्यासाठी आपल्या आरोग्यतज्ञाचा सल्ला घ्या. आम्ही दिलेल्या माहितीची अचूकता सुनिश्चित करण्याचा प्रयत्न करतो, परंतु ही माहिती वैद्यकीय सल्ला नाही.
